十六暝晡煙共花

正月十六暝晡,我共行李搬轉宿舍。宿舍固無別儂,我整理完,自家出門,去食日本菜。

經過旁邊其村,巷巷盡窄。厝裏捅出棍棍,野像會敲響對面檻門囝其玻璃。遐辰候天暗無偌𣆯,前兜俤蜀隻丈夫囝蒂甩了摔炮,嘻嘻笑䟛去。只爿伲囝哥掏𡅏㲺㲺花,邊兜儂圍蜀環相。盡価厝門兜放了盆盆,盆盆貯了土,插了有碗許蠻大其香燒,煙噗囫圇巷巷都是。只大其香,以前㑚敆廟門兜看見過。

行去仂𣆯,安靜仂囝,含不蜀時聽見倏其蜀聲。頭𩓥起去罔覷,是煙花趁這窄窄密密其柴欄厝臺中飛上天空,綻放開去。蜀菩蜀菩,照𡅏地兜暗囇光囇。

蜀墿其煙,滿天其花,我印象臺中做細乍看見過。

18年5月23號暝晡寫,今旦改了仂囝


平話漢字 | Bàng-uâ Lò̤-mā-cê